A REAL SOCIEDAD ECONÓMICA ABORDARÁ EN 2024 UN AMBICIOSO CICLO DE DEBATE SOBRE O FUTURO DA CIDADE
Os principais asuntos que preocupan aos composteláns e os retos de futuro da capital galega, serán os eixos centrais do ciclo de debate da Real Sociedad Económica de Amigos del País de la Ciudad de Santiago, “Compostela 2023-2027. Presente e futuro”, na programación que a nosa institución desenvolverá ao longo do próximo ano 2024.
As mesas de discusión, que pretenden promover a reflexión sobre a problemática, pero ao mesmo tempo, sobre as oportunidades para a nosa cidade, arrancarán o próximo 24 de xaneiro, cunha disertación do catedrático de Dereito Constitucional da USC Roberto Blanco Valdés sobre un tema de máxima actualidade: “De Santiago a Madrid, pasando por Galicia: A ordenación territorial en España”.
Un mes máis tarde, o 28 de febreiro, será a quenda do director executivo da Fundación Pública de Medicina Xenómica e catedrático de Medicina Legal da USC, Ángel Carracedo Álvarez, que afondará sobre como será a sanidade e a saúde pública a medio e longo prazo, no debate titulado “Anticipando a medicina do futuro”.
Para o 20 de marzo está prevista a mesa “Máis intervencionismo municipal ou máis sociedade civil”, acerca do papel que deben desempeñar as institucións públicas locais e a cidadanía, que encabezará Miguel Anxo Bastos Boubeta, profesor titular de Ciencia Política e da Administración da Universidade de Santiago de Compostela.
O 24 de abril, o catedrático de Enxeñería Química da USC e reitor da Universidade compostelá entre os anos 2010 e 2014 Juan Casares Long, falará sobre “Personaxes ilustres na RSEAPS e en Santiago”.
Os protagonistas o 28 de maio serán Darío Villanueva, catedrático de Teoría da Literatura e de Literatura Comparada da USC, director da Real Academia de la Lengua (2014-2018) e reitor da USC (1994-2002) -Premio Princesa de Asturias das Letras en 2015-; Antonio López Díaz, actual reitor e catedrático de Dereito Financeiro e Tributario da USC; e Juan Viaño reitor da USC (2014-2018) e catedrático de Matemática Aplicada da Universidade compostelá; que intervirán no debate titulado “A USC, presente e futuro”.
El recientemente elegido arzobispo de Santiago, Francisco José Prieto Fernández, ofrecerá el 20 de junio una visión sobre la situación de la comunidad eclesiástica en la ciudad, en la mesa titulada “La Iglesia, en la Compostela de hoy”. Prieto Fernández es también licenciado en Teología Patrística por la Universidad Gregoriana de Roma y doctor en Teología Bíblica por la Universidad Pontificia de Salamanca.
O recentemente elixido arcebispo de Santiago, Francisco José Prieto Fernández, ofrecerá o 20 de xuño unha visión sobre a situación da comunidade eclesiástica na cidade, na mesa titulada “A Igrexa, na Compostela de hoxe”. Prieto Fernández é tamén licenciado en Teoloxía Patrística pola Universidad Gregoriana de Roma e doutor en Teoloxía Bíblica pola Universidad Pontificia de Salamanca.
A economía local e os oficios tradicionais tamén terán o seu espazo no ciclo de debate da RSEAPS, coa mesa “Pasado, presente e futuro do sector da artesanía en Santiago de Compostela”. Terá lugar o 26 de setembro, protagonizada por Enrique Fink, presidente de Ourives de Compostela; Elena Fabeiro Castro, presidenta de Artesanía de Galicia; e Mónica Cao Pereira, propietaria de MOCAO Artesanía e membro da asociación Creativas Galegas.
E pecharán o ciclo, o 23 de outubro, Belén Hernández Lafuente, xerente do Consorcio de Santiago, coa mesa titulada “Legado patrimonial de Santiago: reflexións de futuro”; e o 27 de novembro, José Antonio Redondo López, catedrático de Economía Financeira da USC, e Miguel Vázquez Taín, presidente do Consello Galego de Economistas, co debate “O papel de Santiago na UE”.
A directiva da RSEAPS e o seu presidente, Francisco Loimil, lembran “o espírito de absoluta pluralidade que preside tódalas iniciativas da Real Sociedad”, animando a asistir e participar nos debates a tódolos cidadáns de Santiago que o dexesen, “porque os asuntos que van tratar son de vital importancia para o futuro da nosa cidade”. Tódalas mesas do ciclo “Compostela 2023-2027. Presente e futuro” programadas para 2024 terán lugar na sede da RSEAPS, e son de balde e abertas ao público ata completar aforo.
A RSEAPS PROPÓN UNHA VIAXE POLA HISTORIA DE SANTIAGO A TRAVÉS DOS SEUS FONDOS ARTÍSTICOS
A Real Sociedad Económica lanza a súa segunda gran proposta para 2024: o ciclo de conferencias “A Real Sociedad Económica de Amigos del País de la Ciudad de Santiago e os seus fondos artísticos”, que desenvolverá co Grupo de Investigación IACOBUS da Facultade de Xeografía e Historia da Universidade de Santiago de Compostela e co patrocinio da Deputación Provincial da Coruña. O seu obxectivo é achegar aos composteláns o notable patrimonio artístico que posúe a RSEAPS, afondando ao mesmo tempo no destacado papel que xogaron no devir da historia recente da capital galega os autores das obras e os personaxes retratados nelas.
A programación arrancará o 14 de febreiro cunha disertación do catedrático de Historia da Arte do IES Rosalía de Castro de Santiago Leopoldo Fernández Gasalla, que versará sobre os retratos de Pedro Sánchez Vaamonde e de Antonio Páramo y Somoza, fundadores en 1784 da RSEAPS. O 13 de marzo, o protagonista será Francisco Singul Lorenzo, xefe da área de Cultura Xacobea da S.A. Xestión do Plan Xacobeo da Xunta de Galicia, que falará sobre o retrato de Francisco Sebastián Malvar y Pinto, prelado compostelán ilustrado.
O 10 de abril será a quenda de David Chao Castro, profesor contratado doutor de Historia da Arte da USC, cunha conferencia titulada: “Juan José Viñas, un santiagués exemplar do século XIX”. Un mes máis tarde, o 15 de maio, Diego Rodríguez Paz, profesor de Ensino Secundario e investigador especializado na obra de Dionisio Fierros fará unha aproximación aos retratos dese autor que forman parte dos fondos artísticos da RSEAPS. E o 12 de xuño, Carme López Calderón, profesora axudante doutora de Historia da Arte da USC, disertará sobre unha colgadura bordada alusiva ao primeiro centenario da Real Sociedad Económica (1884), aproveitando para facer un retrato da época na que foi elaborada.
Tra-la pausa estival, o ciclo continuará o 11 de setembro coa charla da profesora axudante doutora de Historia da Arte da USC Miriam Elena Cortés -Premio Domingo Fontán de investigación histórica 2022 da RSEAPS, o Consorcio de Santiago e a USC-, baixo o título “Manuel Pereiro Caeiro, moito máis que un gran mestre de obras”. O 9 de outubro, Marta Cendón Fernández, profesora titular de Historia da Arte da Universidade compostelá, pronunciará a conferencia “Manuel Lago González, o arcebispo querido por todos”. Seguiralle, o 13 de novembro, unha presentación de Begoña Fernández Rodríguez, tamén profesora titular de Historia da Arte da USC, sobre o cadro “A clase de pintura, de Elvira Santiso”, que se centrará na pegada formativa deixada pola Real Sociedad Económica ao longo da súa historia. E pechará a programación, o 11 de decembro, Ramón Yzquierdo Peiró, director do Museo da Catedral de Santiago, coa conferencia “A cruz da Inquisición, referente dun tempo pasado”.
A RSEAPS lembra que tódalas conferencias deste ciclo terán lugar ás 19,30h, na sede da RSEAPS (Plaza Salvador Parga, 4 – Santiago de Compostela), son de acceso libre ata completar aforo e serán retransmitidas en directo a través da canle de You Tube da Real Sociedad: RSEAPS-Amigos del País de Santiago. No caso de que se produzan modificacións das datas das conferencias, serán notificadas convintemente a través da páxina web da RSEAPS (www.rseaps.org).
