O catedrático de Historia da Arte da USC e directivo da RSEAPS Juan Manuel Monterroso Montero arroxará luz sobre a figura de Carlos III de Borbón coa súa conferencia do próximo mércores, 5 de febreiro, “Un rei para a Real Sociedad de Amigos del País”, primeira deste ano do ciclo “A Real Sociedad Económica de Amigos del País de la Ciudad de Santiago e os seus fondos artísticos”, organizado por esa institución, en colaboración co Grupo de Investigación IACOBUS da Facultade de Xeografía e Historia da Universidade de Santiago de Compostela.
Monterroso Montero, que se referirá a un dos dous retratos do monarca -que impulsou as reales sociedades económicas en España-, que forman parte do patrimonio artístico da RSEAPS, será presentado por Marta Cendón Fernández, profesora titular de Historia da Arte da USC, nunha mesa que conducirá o presidente da Real Sociedad Económica, Francisco Loimil Garrido, que inaugurará dese xeito este ciclo en 2025.
O acceso para o público é libre e gratuíto ata completar o aforo da sala. Ademais, está programada a emisión en directo da conferencia, á que seguirá un coloquio cos asistentes, pola canle de You Tube da RSEAPS: RSEAPS-Amigos del País https://www.youtube.com/@rseamigosdelpaissantiago
