O catedrático da USC cré que “xa existe unha capacidade demostrada para transformar o coñecemento en empresas, con impacto real canto a emprego cualificado e actividade económica”
O catedrático de Economía Financeira e Contabilidade da USC Luis Otero González asegura que a Universidade de Santiago “está consolidando o seu papel como un dos axentes de referencia na creación de empresas spin-off de base científica e tecnolóxica”.
Na segunda das mesas de debate do ciclo “Compostela 2023-2027. Presente e futuro”, programadas para 2026 pola Real Sociedad Económica de Amigos del País de la Ciudad de Santiago, Otero afirmou que a USC sitúase xa “entre as catro principais universidades españolas” na creación dese tipo de empresas: “A institución presenta un balanzo positivo do seu modelo de transferencia, apoiado en resultados tanxibles, unha estrutura de apoio madura e unha estratexia orientada a xerar valor económico e social no territorio”.
O catedrático subliñou que na Universidade compostelá “xa existe unha capacidade demostrada para transformar coñecemento en empresas, cun impacto real canto a emprego cualificado e actividade económica”. Nese senso indicou que “ese avance susténtase nunha base de transferencia estruturada e na mellora dos procesos de apoio aos proxectos empresariais xurdidos da investigación universitaria”.
Entre os factores que contribuíron a chegar a esta posición, Otero salienta “a profesionalización do seu proceso investidor, como un paso clave para mellorar a selección e acompañamento de iniciativas con maior potencial”. E ao mesmo tempo, identifica con claridade o principal reto do ecosistema: “Non só crear novas spin-off, senón facilitar o seu crecemento e consolidación en fases de escalado”.
Liderado da USC e novo pulo para o escalado
“Para afrontar ese desafío”, dixo, “a Universidade considera prioritario reforzar os instrumentos de financiamento en etapas temperás e en fases de scale-up, co fin de evitar que proxectos con alto potencial perdan tracción no seu desenvolvemento”. Asimesmo, Otero incide en que “a política de spin-off debe integrarse nunha estratexia territorial máis ampla, conectada cos obxectivos de innovación, competitividade e creación de emprego de calidade en Galicia”.
Con esta visión, o catedrático cré que a Universidade de Santiago “está reafirmando o seu compromiso cun modelo de universidade que, ademais de formar e xerar coñecemento, impulsa novas empresas capaces de transferir ciencia ao mercado e contribuír ao progreso económico e social”. Nesta mesa de debate, Luis Otero foi presentado polo presidente da Real Sociedad Económica de Santiago, Francisco Loimil Garrido.
