Primeira conferencia na Real Sociedad Económica de Amigos del País de la Ciudad de Santiago tralo parón do verán. Mañá mércores, a profesora axudante doutora de Historia da Arte da Universidade de Santiago de Compostela (USC) Mirian Elena Cortés López, pronunciará a conferencia titulada: “Manuel Pereiro Caeiro, moito máis que un gran mestre de obras”, a partir do retrato dese personaxe histórico que forma parte do patrimonio da RSEAPS.
Pereiro Caeiro foi un compostelán polifacético, cuxas obras executadas -como o novo Mercado de Abastos ou a sede da Caixa de Aforros e Monte de Piedade- concéntranse fundamentalmente en Santiago de Compostela, malia que tamén foi concelleiro e xefe superior de Administración Civil na capital galega, deputado provincial por Santiago, mestre de obras e fundador da Cámara de Comercio compostelá.
A charla está incluída no ciclo de 2024 “A Real Sociedad Económica de Amigos del País de la Ciudad de Santiago e os seus fondos artísticos”, organizado pola RSEAPS, en colaboración co Grupo de Investigación Iacobus da Facultade de Xeografía e Historia da USC. Cortés será presentada por Sara Carreño López, tamén profesora axudante doutora de Historia da Arte da USC, nunha mesa que encabezará o presidente da Real Sociedad Económica compostelá, Francisco Loimil Garrido.
A RSEAPS lembra que tódalas conferencias deste ciclo son de acceso libre e de balde para o público, ata completar aforo. A conferencia de Miriam Elena Cortés López será emitida ademais pola canle de You Tube RSEAPS-Amigos del País (https://www.youtube.com/@rseamigosdelpaissantiago), a través da seguinte ligazón: https://youtube.com/live/UkybsT0p9fE?feature=share
