O deputado e profesor da USC defendeu na Real Sociedad Económica que o deterioro da democracia consensual leva a “porcións significativas da poboación a procurar refuxio en solucións nacional-populistas e mesmo autoritarias”
“O impulso desde a sociedade civil do reforzo institucional, e o cumprimento e desenvolvemento das regras democráticas e as institucións do Estado de Dereito -nomeadamente no contorno europeo e nacional-, é a vía máis esperanzadora para evitar a caída nun novo ciclo de involución, autoritarismo e conflito civil”.
Esa é a principal conclusión á que chegou o deputado e profesor da Facultade de Dereito da USC Pedro Puy Fraga, na mesa debate “Política, economía e democracia”, incluída no ciclo “Compostela 2023-2027. Presente e futuro”, que tivo lugar esta tarde na Real Sociedad Económica de Amigos del País de la Ciudad de Santiago (RSEAPS).
Puy Fraga alertou do perigo que se cerne sobre a nosa sociedade na actualidade, debido á situación económica, marcada pola “incertidume e a desigualdade”, e política, caracterizada agora pola “polarización e a fragmentación”, sumadas aos cambios sociais e tecnolóxicos no deterioro das regras que eran aceptadas socialmente, tanto na orde internacional, como na nacional.
“Como consecuencia dilo”, afirmou, “a democracia consensual, que foi o marco institucional que prevaleceu e á vez propiciou o período dos trinta gloriosos, deteriórase”, levando a “porcións significativas da poboación a procurar refuxio, en ausencia de regras, en solucións nacional-populistas e mesmo autoritarias”.
Para o político e profesor, no pasado as democracias liberais tiñan a capacidade de inducir estabilidade económica (“reducir a incertidume e xerar contornos innovadores”), e política (“satisfacción coas políticas públicas e os procesos redistributivos da renda”), “fundamentándose no consenso en torno ás regras do xogo democrático e o respecto expreso e implícito a esas regras consensuadas”.
Por todo ilo, a gran pregunta neste momento segundo Puy Fraga -que aportou datos e exemplos concretos sobre a situación actual de España-, é se seremos quen de volver recuperar un amplo consenso sobre as regras que rexen a orde internacional e a orde política interna.
Na mesa de debate, o ponente, que respondeu ás cuestións formuladas polos asistentes trala súa intervención, foi presentado polo presidente da Real Sociedad Económica compostelá, Francisco Loimil Garrido.
